2026 жылғы 18 ақпанда № 266-VIII ЗРК «Қазақстан Республикасының кейбір заңнамалық актілеріне креативті индустрияларды қолдау және дамыту мәселелері бойынша өзгерістер мен толықтырулар енгізу туралы» Заң қабылданды. Құжат креативті экономиканы институционалдық тұрғыдан нығайтуға және сала өкілдеріне мемлекеттік қолдау тетіктерін жүйелеуге бағытталған.

Заң аясында креативті индустрия субъектілерінің тізілімі құрылады. Бұл креативті қызметпен айналысатын жеке және заңды тұлғаларды тіркеу мен есепке алуға арналған онлайн-платформа.
Тізілімді уәкілетті мемлекеттік орган әкімшілендіреді және ол:

• креативті сектор субъектілерін жүйелеуге;
• саланың ашықтығын арттыруға;
• мемлекеттік қолдау шараларын тиімді әрі мақсатты ұсынуға;
• креативті индустриялардың даму динамикасын мониторингтеуге мүмкіндік береді.

Бұл бастама креативті экономиканы қолдаудың жаңа кезеңін айқындайды.

Заңмен уәкілетті органға креативті индустрия субъектілерінің тізілімін қалыптастыру және жүргізу, сондай-ақ мемлекеттік бірлесіп қаржыландыру шеңберінде жеке инвестицияларды тарту процесіне мониторинг жүргізу өкілеттіктері берілді. Бұл нормалар мемлекеттік және жекеменшік секторлар арасындағы өзара іс-қимылды күшейтуге және инвестициялық белсенділікті арттыруға бағытталған.

Әкімдіктерге креативті кәсіпкерлікті дамытуға қолайлы жағдай жасау, шығармашыл азаматтар мен таланттарды тану және олардың әлеуетін іске асыру бойынша өкілеттіктер берілді.

Сонымен қатар, заңнамалық деңгейде креативті индустрияларда жұмыспен қамтылған қызметкерлердің құқықтары бекітілді.

Қазақстанда креативті индустрия субъектілеріне мемлекеттік қолдау және ынталандыру қағидалары бекітілді. Жаңа құжат саланы дамытудың жүйелі әрі ашық тәсілін қалыптастырады және креативті жобалардың бүкіл өмірлік циклін идея мен пилоттық шешімдерден бастап халықаралық нарыққа шығу мен коммерцияландыруға дейінгі кезеңдерді қамтиды.

Қағидаларда қаржыны қайтарымдылық негізінде ұсыну тетігіне ерекше назар аударылған. Мемлекеттік қолдау жобалардың тұрақтылығы мен экономикалық өміршеңдігіне бағытталған. Гранттық қаржыландырудың үлесі барынша азайтылып, жеке инвестицияларды белсенді тарту көзделген.

Бұл тәсіл креативті бастамаларды нарықтық қағидаттар негізінде дамытуға және саланың инвестициялық тартымдылығын арттыруға мүмкіндік береді.

Қағидалар аясында мынадай қаржылық тетіктер қарастырылған:

• креативті және пилоттық жобаларды қаржыландыру және бірлесіп қаржыландыру;
• жеке инвесторлармен бірлескен бастамаларды іске асыру;
• креативті өнім экспортын қолдау;
• зияткерлік меншік объектілерін тіркеу және құқықтық қорғау шығындарын өтеу;
• халықаралық шығармашылық конкурстар мен іс-шараларға қатысуды қолдау;
• халықаралық деңгейдегі жетістіктері үшін сыйақы беру.

Аталған құралдар жобалардың бәсекеге қабілеттілігін арттыруға және қазақстандық креативті өнімдерді жаһандық нарыққа ілгерілетуге бағытталған.

Құжатта қаржылық емес қолдау шараларының кең ауқымы да көзделген. Олардың қатарында:

• консультациялық, акселерациялық және білім беру қолдауы;
• халықаралық мәдени және креативті платформаларға қатысуға жәрдемдесу;
• үй-жайлар мен жабдықтарды жеңілдетілген шарттармен ұсыну;
• цифрлық сервистер мен онлайн-платформаларды дамыту;
• жобаларды маркетингтік және құқықтық сүйемелдеу;
• креативті индустрияны дамытудың өңірлік стратегияларын әзірлеу;
• инклюзияны қамтамасыз ету шаралары;
• саланың жекелеген бағыттары бойынша арнайы бағдарламалар.

Бұл шаралар креативті кәсіпкерліктің экожүйесін нығайтуға және өңірлік деңгейде теңгерімді дамуды қамтамасыз етуге мүмкіндік береді.

Қағидалардың қабылдануы креативті индустрияны қосылған құн қалыптастыратын, жаңа жұмыс орындарын ашатын және елдің экспорттық әлеуетін күшейтетін экономиканың толыққанды секторына айналдыру үшін институционалдық негіз қалыптастырады.

Осылайша, креативті индустрия Қазақстан экономикасының әртараптандырылуына және инновациялық дамуына серпін беретін стратегиялық бағыт ретінде айқындалып отыр.